Cwtsh Myrddin

Colofn Ysgol Gyfun Gymraeg Bro Myrddin

TACHWEDD 2007

 

I’r Ffair!
Estynnwn groeso cynnes i chi gyd i ffair Nadolig yr ysgol ar nos Iau  yr ail ar hugain o Dachwedd.  Noson o hwyl a sbri, yn cychwyn am 6.30 yh yn neuadd yr ysgol yng nghwmni’r athrawon, y disgyblion a’n gwestai gwadd Miss Nerys Evans.  Dewch i weld stondinau Nadoligaidd y pedwar llys – Hengwrt, Hergest, Llwydiarth a Pheniarth yn llawn siocledi, nwyddau persawrus, cardiau ac addurniadau.  Cewch gyfle i gael paned a chlonc ac hyd yn oed ymweld â grotto sion corn. Ymunwch â ni ym mwrlwm dathliadau Nadolig yr ysgol.  Edrychwn ymlaen i’ch gweld!

Dewch yn nes!

Dewch draw ymhell i Groes-y-Ceiliog a throediwch i mewn i’r ogof hon sy’n llawn trysorau.  Dewch yn nes i glywed am yr ogof dywyll a môr ladron T Llew Jones, y wal ddringo, dramau a gwisgoedd Shakespearaidd a llawer mwy. Lle gwell i gael blas o’r holl brofiadau hyn? 

Wel yn Noson Agored Ysgol Bro Myrddin wrth gwrs!  

Nos Iau’r ddeunawfed o Hydref agorodd Ysgol Bro Myrddin ei drysau i blant a rhieni newydd.  Estynnwyd croeso cynnes iddynt i weld yr ysgol ar waith.  Braf oedd gweld yr ysgol o dan ei sang a phawb yn mwynhau’r amrywiaeth o weithgareddau.    Wedi derbyn croeso cynnes wrth fynedfa’r ysgol  a chlywed y gerddorfa yn brysur wrth eu gwaith, cafodd yr ymwelwyr eu tywys  o gwmpas yr ysgol gan y Prif Swyddogion.  Denwyd sylw’r bobl ifanc gan yr arddangosfa gymnasteg a’r wal ddringo newydd, a’r perfformiadau gan y chweched dosbarth.   Wrth gamu i’r Ystafell Gelf, gwelwyd y plant  wrthi’n frwdfrydig yn creu patrymau anarferol allan o blastig.  Cynllunio a chreu crysau t Cymraeg oedd menter newydd rhai o flwyddyn 10, tra bod eraill yn gwerthu cynnyrch a nwyddau Cymreig.  O’r gwisgoedd Shakespearaidd a’r goleuadau llachar cawsant eu tywys gan fôr ladron T Llew Jones i mewn i ddirgelwch yr ogof dywyll. Profiad anhygoel! Cyfle i wneud arbrofion amrywiol yn y labordai ac i grafu pen wrth wneud symiau.  Digon o sgwrsio difyr a gwydraid o sangria i bawb oedd yn dymuno.  Noson lwyddiannus yn wir!

O Groesyceiliog i Drawsfynydd

         Yn ystod tymor yr Hydref aeth criw o ddisgyblion blwyddyn 10 ar daith i Drawsfynydd er mwyn ymweld â’r man lle ganed y prifardd Hedd Wyn.  Wedi ambell broblem technegol gyda’r cerbydau, dechreuwyd ar y daith awr yn ddiweddarach nac y bwriadwyd.  Er hyn, llawen oedd pawb wrth aros yn eiddgar i’r bysiau gychwyn ar y daith hir i’r gogledd. 

         Doedd y tywydd yn amlwg ddim yn adlewyrchu hwyliau da y disgyblion, ac wrth i’r glaw dasgu ar y ddau fws mini, prysurwyd ymlaen i gyrraedd pen y daith.  Ar ôl tair awr flinedig, cyrhaeddwyd harddwch pentref Trawsfynydd.  Gwelwyd nifer o arteffactau diddorol yng Nghanolfan Treftadaeth Llys Ednowain megis y groes bren wreiddiol oddi ar fedd Hedd Wyn.  Treuliwyd hanner awr wedyn yn crwydro’r pentref lle gwelwyd cofeb i Hedd Wyn a’r tŷ bychan lle ganwyd ef.

         Arhoswyd nesaf yn yr Ysgwrn, y tŷ fferm a oedd yn gartref i Hedd Wyn.  Roedd y tŷ wedi cael ei adael yn union fel yr oedd gan mlynedd yn ôl, felly teimlai’r disgyblion fel petaent yn camu yn ôl i’r gorffennol wrth gerdded i mewn i’r tŷ.  Croesawyd y disgyblion gan nai Hedd Wyn, Mr Gerald Williams, a pherthynas pell iddo o’r enw Mr Evans.  Dangoswyd lluniau o’r teulu, llythyron, erthyglau papur newydd a’r fedal a gafodd y teulu ar ôl marwolaeth Hedd Wyn.  Yna tywyswyd y disgyblion i mewn i ystafell fechan.  Ynddi arhosai chwe chadair Eisteddfodol, gan gynnwys “Y Gadair Ddu.”  Adroddwyd stori drist Hedd Wyn gan ei nai;  stori’r bugail llwm a orfodwyd i ymuno â’r fyddin, ei freuddwyd am ennill cadair yr eisteddfod, a sut daeth y freuddwyd yma’n wir ychydig wythnosau ar ôl iddo gael ei ladd yn ffosydd Belg.  Gwrandawyd yn astud am wastraff rhyfel, a’r ffaith drist fod cenhedlaeth gyfan o ddynion y plwyf wedi eu colli yn y Rhyfel Mawr.  Cafwyd sesiwn cwestiwn ac ateb, cyn gorfod cychwyn yn ôl i’r De unwaith eto.  Gadawyd pentref hardd Trawsfynydd gydag atgofion gwych  o’r daith fythgofiadwy yma. 

Limrig y mis

 

 Am noson anhygoel, arbennig

dewch draw atom ni am ychydig.

Fe gewch hwyl a sbri,

yn gwmni i ni,

Ymunwch yn ffair  y Nadolig.