Ffug Etholiad Ysgol Bro Myrddin

Roedd hi’n ddiwrnod hanesyddol ar draws Cymru a Phrydain ar y 6ed o Fai, ac wrth i oedolion y wlad benderfynu ar dynged y wlad am y pedair blynedd nesaf, lledaenodd democratiaeth i blant ysgol Bro Myrddin hefyd, wrth i’r ffug-etholiad ysgol gydio yn nychymyg yr ysgol gyfan. Trefnwyd yr etholiad gan adran wleidyddiaeth yr ysgol.

 

Bu’r ymgeiswyr yn ymgyrchu am wythnos gyfan bron gyda’r polau opiniwn wedi eu rhannu rhwng y Blaid Lafur (Daniel Jones), y Blaid Geidwadol (Curon ‘Cameron’ Howells), y Democratiaid Rhyddfrydol (Siôn Evans), Plaid Cymru (Guto Ifan) a’r Monster Raving Loony Party (Tom Jones-Davies). Yn rhyfedd iawn y Monster Raving Loony Party a wnaeth ennill yr etholiad bum mlynedd yn ôl, ond roedd y pedwar arall yn benderfynol o gipio’r sedd y tro hwn.

 

Ar brynhawn Mercher cynhaliwyd Hawl i Holi gyda’r ymgeiswyr a rhoddwyd cyfle i bawb i wrando ar bolisïau’r pleidiau. Ar y diwrnod mawr cafwyd gwasanaeth ysgol gyda’r ymgeiswyr yn areithio, ac yn ceisio ennill pob pleidlais bosib.

 

Yna, daeth yr awr i fwrw pleidlais, gydag ystafell D2 yn ferw o gynnwrf drwy’r amser egwyl a chinio.

 

Canlyniadau'r Etholiad

Plaid Cymru- 137

Master Raving Looney- 107

Ceidwadwyr- 80

Llafur- 50

Democratiaid Rhyddfrydol- 46

 

Buddugoliaeth, felly, i Blaid Cymru.  Diolch yn fawr i bawb a bledleisiodd a diolch yn fawr i’r adran wleidyddiaeth am wneud yn siŵr bod democratiaeth wedi cyrraedd pawb yn yr ysgol ar ddiwrnod hanesyddol iawn.

 

Gwobrau Efydd Dug Caeredin

Llongyfarchiadau i’r canlynol o flwyddyn 12 ar ennill eu Tystysgrifau Efydd Gwobr Dug Caeredin:

Hannah Jameson                                       Betsan Evans

 

Naomi Elais                                               Nia Binding

 

Daniel Jones                                             Alex Osborne

 

Lowri Jones                                               Manon Owens

 

Gwen Page Roberts                                    Sara Jones

 

Bethan Randell                                           Bethan Evans

 

Gwyn Pierce (bl 13)                                    Fflur Rhys

 

Siomon O’Leary                                          Alis Lewis

 

Maria Mistry                                              Lindsey Wyke

 

Teleri Fflur Jones                                      Lisa Davies

 

Lema Imam                                                 Sioned  Harries

 

Trystan Harries

 

Hannah Garrad

 

Nia Davies

 

Ceirios Davies

 

Ffion Rees

 

Enillydd Tlws yr Ifanc

Llongyfarchiadau i Manon Ifan blwyddyn 12 ar ennill Tlws yr Ifanc yn Eisteddfod Talgarreg yn ddiweddar.  Enillodd y wobr am ddau ddarn gwrthgyferbyniol, sgript a stori fer. 

 

Enillydd Pop Idol Caerfyrddin 2010

Bu llwyddiant mawr i Catrin Thomas blwyddyn un ar ddeg, yn y gystadleuaeth ‘Pop Idol’ Sir Gâr. Enillodd Catrin ei chystadleuaeth hi yn y categori 11-16 mlwydd oed, ac fe lwyddodd i ennill y gystadleuaeth gyfan trwy ei chanu anhygoel. Dywedodd Catrin ei bod yn falch iawn o ennill ond ei bod wedi cael sioc. Y gân ‘Hallelujah’ a enillodd y wobr iddi.

 

Taith Daearyddiaeth i Gaerdydd

Ar y 31ain o Fawrth 2010, bu criw o ddisgyblion o flwyddyn 12 sy’n astudio Daearyddiaeth fel pwnc uwch Gyfrannol ar ymweliad a Chanol a Bae Caerdydd fel rhan o’u hymchwiliadau gwaith maes. Doedd y tywydd garw ag oer eithafol yn amlwg ddim yn adlewyrchu hwyliau gwresog y disgyblion, a mawr fu’r mwynhad wrth i ni gael ein tywys o gwmpas y Bae, ar droed, mewn bws ac mewn cwch hyd yn oed! Treuliwyd ychydig amser yng nghanol y ddinas yn holi trigolion yr ardal am eu harferion siopa, ac yna teithiwyd i Barc Adwerthu Croes Cwrlwys i orffen y daith, er mwyn arsylwi ar y mathau o fusnesau sydd wedi adleoli ar gyrion y ddinas. Bu’r ymweliad yn llwyddiant ysgubol, a hoffai’r disgyblion oll ddiolch i Mrs. Alwen Haf Owen am drefnu’r diwrnod llwyddiannus.  Diolch hefyd am gwmni Mrs. Tracy Jenkins a ddaeth i gynorthwyo.