Ymweliad Techniquest: Treuliodd rhai o ddisgyblion blwyddyn deg ddiwrnod yng nghwmni cynrychiolwyr o’r ganolfan Techniquest yn ddiweddar. Cawsant y profiad o dreialu deunydd newydd a baratowyd ar gyfer disgyblion TGAU. Bu’r criw yn gwylio DVD a oedd yn canolbwyntio ar sut y cynlluniwyd adeilad y Cynulliad . Trafodwyd hefyd yr amryw ddefnyddiau sy’n cael eu defnyddio i adeiladu tai. Yn eu grwpiau roedd yn rhaid i’r disgyblion bwyso a mesur y costau yn ogystal â’r effaith ar yr amgylchedd, cyn dod i benderfyniad pa ddefnyddiau oedd orau. Cafwyd cyflwyniadau diddorol iawn gan bawb cyn terfynu. Bu tîm Eifion Evans, Marco Lewis, Thomas Evans, Chris Blandford a Craig Tidey yn fuddugol yn y bore a thîm Emyr Morris, Rhys Evans, Luke Davies a James Williams yn fuddugol yn y prynhawn. Llongyfarchiadau mawr iddynt!
Y Naid Uchel: Llongyfarchiadau mawr i Rhiannon Plant o flwyddyn naw am ddod yn gyntaf yng Nghymru yn y naid uchel, ac i Dafydd Williams o flwyddyn unarddeg am ennill y naid hir a’r naid driphlyg.
Mosgito:Camerâu di-ri a chyflwynwyr bywiog. Dyma’r hyn oedd i’w weld ar hyd goridorau’r ysgol yr wythnos ddiwethaf. Treuliodd Y BBC a chriw’r rhaglen deledu “Mosgito” ddiwrnod yn yr ysgol yng nghwmni’r Adran Gelf a disgyblion blwyddyn wyth. Yn dilyn trafodaethau difyr gan y cyflwynwyr eu tasg oedd i gynllunio logo newydd ar gyfer y rhaglen hon. Yn ogystal cafodd blwyddyn saith y cyfle i ymweld â Bws y BBC ac i sgwrsio gyda rhai o weithwyr S4C.Athletau: Dewiswyd Ffion Rees, Rheon James a Jonathan Gardiner o flwyddyn deg i gynrychioli Cymru mewn athletau yn y Gemau Celtaidd yng Nghaerdydd ar y trydydd o Chwefror.
Nofio: Bu Hannah Rynolds, Beth Jones a Megan Jones yn nofio ym Mhwll Nofio Cenedlaethol Cymru Abertawe yn rownd derfynol Cystadleuaeth Nofio’r Urdd yn ddiweddar. Llongyfarchiadau mawr iddynt oll !Dathlu Santes Dwynwen: Roedd Dydd Gwener y pumed ar hugain o Ionawr yn ddiwrnod arbennig i nifer o ddisgyblion Bro Myrddin. Diwrnod Santes Dwynwen oedd hi, wrth gwrs ac aethpwyd ati i ddathlu’r achlysur mewn steil. O dan arweiniad y chweched dosbarth trefnwyd diwrnod gwisg ein hunain gyda’r lliw coch yn thema. Cynhaliwyd gweithgareddau amrywiol yn ystod y dydd megis cystadleuaeth Sion a Sian yn ystod yr awr ginio, a chyfle i brynu rhosyn neu bennill cariadus i berson arbennig. Cafodd sawl disgybl syrpreis bach neis pan ddosbarthwyd rhosyn coch iddynt gan dylwythen deg o’r chweched dosbarth. Yn ôl Emma Nicholas o flwyddyn deuddeg “Roedd ymateb y disgyblion a’r athrawon yn wych. Braf oedd gweld yr ysgol yn fôr o goch a phinc a chymaint o frwdfrydedd wrth ymuno yn yr holl firi. Bu’r diwrnod yn llwyddiant mawr.”
Cwrs Pontio: Fel rhan o gynllun Pontio’r ysgol aeth criw o ddisgyblion Blwyddyn 6 y dalgylch i Wersyll yr Urdd Llangrannog gydag athrawon Ysgol Bro Myrddin er mwyn cael cyfle i gymdeithasu a gwneud ffrindiau newydd yn barod ar gyfer mis Medi. Mae hwn yn gyfle da bob blwyddyn i dawelu meddyliau’r disgyblion cyn iddynt adael yr ysgol gynradd a dechrau ar eu haddysg mewn ysgol newydd. O dan arweiniad Mr Wyn Evans treuliasant bedwar diwrnod yn cymdeithasu a mwynhau llu o weithgareddau a drefnwyd ar eu cyfer.
