Huw Collins yn hyrwyddo newid hinsawdd: Ym mis Medi 2007 lansiwyd cystadleuaeth gan Lywodraeth Cynulliad Cymru i ddarganfod pedwar o hyrwyddwyr newid yn yr hinsawdd i Gymru. Byddai’r pedwar unigolyn yma yn cymryd rhan mewn digwyddiadau ac yn siarad â’r cyfryngau yn eu hardal am yr hyn y gallwn ni gyd ei wneud i ymdopi â’r newid yn yr hinsawdd.
Un disgybl a ddangosodd ddiddordeb yn syth ac a greodd argraff ar y beiriniaid oedd Huw Collins o Ysgol Bro Myrddin. Pan ddarllenodd yr erthygl yn y papur newydd yn hysbysebu’r gystadleuaeth penderfynodd fynd ati ar unwaith i greu gwefan a oedd yn sôn am yr holl newidiadau yn yr hinsawdd, gan gynnig syniadau sut y mae achub yr amgylchedd. Roedd dau gant ac un o ymgeiswyr yn y gystadleuaeth hon a oedd yn agored i bobl ifanc o unarddeg oed i ddeunaw oed; tipyn o gamp felly i Huw Collins sydd ond yn ddisgybl ym mlwyddyn 7. Wedi llwyddo i gyrraedd y pedwerydd ar ddeg cystadleuydd olaf cafodd gyfweliad yng Ngwesty’r Ddraig yn Abertawe.
Roedd gofyn i’r ymgeiswyr greu adroddiad ar gyferpapur newydd neu wefan a fyddai’n annog eu ffrindiau , teulu, ysgol neu gymuned i ymdrin â’r newid amgylcheddol hwn.
Bellach mae’r cyfweliadau a’r paratoadau wedi dod i ben. Serch hynny mynegodd yn hollol bendant gyda gwen fawr ar ei wyneb ei fod wedi mwynhau creu’r wefan ac wedi dysgu llawer wrth fod yn rhan o’r gystadleuaeth heriol hon. Mae’n awyddus iawn i barhau â’r gwaith o hyrwyddo newid yn yr hinsawdd. Edrychwn ymlaen i weld y wefan arbennig hon cyn hir. Llongyfarchiadau mawr iddo!
Sialens y llysoedd: Bu tipyn o fwrlwm yn neuadd yr ysgol yn ystod wythnos Sialens y Llysoedd. Gyda’r Her Hunllefus, y Treial Trafferthus a’r ras geiniogau ar ddiwedd tymor y Nadolig cafwyd tipyn o hwyl a chwerthin. Dyma flas o’r gweithgareddau;
Darllenwch adroddiad Saran Richards, Sara Edwards a Siwan Jones ar dudalen Cwtsh Myrddin.
Talwrn y Beirdd: Llongyfarchiadau mawr i dîm Talwrn yr ysgol a lwyddodd i gipio’r cwpan am yr eildro yn olynol yng Nghwrs Cymraeg y chweched dosbarth yng Nglan-llyn. Edrychwn ymlaen i weld eu gwaith yn cael ei gyhoeddi yng nghylchgrawn Barddas yn fuan.
“Iiii-Haa!”: Fe fydd Katie Jones yn ymddangos ar ein sgrinau yn fuan mewn cyfres farchogaeth ar S4C o’r enw “Iiii-Haa!”. Edrychwn ymlaen i’w gweld.
Cerddorfa Ieuenctid Cymru: Llongyfarchiadau mawr i’r disgyblion canlynol am gael eu dewis yn aelodau o Gerddorfa Ieuenctid Cymru eleni; Ffion Bevan o flwyddyn 9, Hawys Freeman o flwyddyn 11, Clare Roberts o flwyddyn 10, Helen Roberts a Sioned Powell o flwyddyn 13 ac Elin Powell sy’n gyn ddisgybl.
Côr Ieuenctid Cymru: Rhaid llongyfarch Rebecca Davies o flwyddyn 10 am gael ei dewis yn ddiweddar i fod yn aelod o gôr Ieuenctid Cymru.
Pencampwriaeth Rhyngwladol Golff Prydain: Mae adran ieuenctid Clwb Golff Caerfyrddin wedi bod yn llwyddiannus iawn drwy ennill Pencampwriaeth Timoedd Cymru ac o ganlyniad wedi cael yr anrhydedd o gynrychioli Cymru yn y bencampwriaeth rhyngwladol a gynhaliwyd yn La Manga, Sbaen ar ddechrau’r mis. Braf yw nodi bod chwech allan o’r saith aelod o’r garfan â chysylltiadau â Bro Myrddin. Yn cystadlu oedd Gareth Rees ac Aled Griffiths sy’n gyn ddisgyblion, Gwenallt Jones o flwyddyn 12, Steffan Jenkins a Gareth Thomas o flwyddyn 11 a Steffan Griffiths o flwyddyn 10.
Polo Dwr: Ddydd Sadwrn Rhagfyr 16 bu Rhys Evans a Daniel Jones o flwyddyn 10 yn ymarfer polo dŵr yn Walsall. Cawsant eu dewis allan o gant a hanner o fechgyn i fod yng ngharfan Academy polo dŵr Prydain. Dymuniadau gorau iddynt gyda’r ymarferion sydd o’u blaenau.
