Newyddion Ysgol Gyfun Gymraeg Bro Myrddin

 

Dathlu Gŵyl Ddewi:  Ddydd Iau a Dydd Gwener diwethaf  aethom ati fel ysgol gyfan i ddathlu Dydd Gŵyl Dewi drwy gynnal eisteddfod. Cawsom ddau ddiwrnod hynod hwylus a braf oedd gweld yr holl frwdfrydedd ar y llwyfan wrth  gystadlu yn ogystal â chlywed llond neuadd o gefnogwyr yn cymeradwyo ac yn dathlu.  Llys Hengwrt a gipiodd darian y siarad cyhoeddus , cyflwynwyd tarian y dawnsio gwerin a’r côr  i lys Peniarth ac enillodd Hergest y tlws ar gyfer yr eitem lefaru orau.
Felly llys Peniarth ddaeth i’r brig eleni, Hergest yn ail, yna Llwydiarth a Hengwrt.  Uchafbwynt yr eisteddfod oedd seremoni’r Goron a’r Gadair.  Rhaid llongyfarch Llew Hopwood o flwyddyn 7 am ennill y Goron a Mair Harries o flwyddyn 11 am ddod yn fuddugol yng nghystadleuaeth y Gadair.  Saran Richards o flwyddyn 9 a enillodd Goron yr Adran Saesneg a Claire Roberts o flwyddyn 10 a ddaeth i’r brig yng nghystadleuaeth y Gadair.  Cawsant ganmoliaeth uchel gan y beirniaid am gyflwyno gwaith aeddfed, o safon uchel iawn. Llongyfarchiadau mawr iddynt!  Diolchwn  yn arbennig i Mr Gareth Evans,  Mrs Yvonne Francis a Mr Berwyn Jenkins am eu gwaith wrth feirniadu’r holl gystadlaethau. 

 

Pencampwriaeth Gymnasteg Brianne:   Bu cystadlu brwd yng nghystadleuaeth gymnasteg Brianne yn ddiweddar.  Yng nghystadleuaeth y bechgyn enillodd Jac Davies o flwyddyn 7 y wobr gyntaf a daeth Euros Thomas  o flwyddyn 8 yn drydydd.  Alyssa Jones o flwyddyn 7 a ddaeth yn fuddugol yng nghystadleuaeth y merched gydag Alys Williams yn ail, Megan Locker yn bumed a Nerys Evans yn chweched.  Llongyfarchiadau mawr! Daliwch ati!