Tyfu Grav

Y Gymdeithas Farfol!

Eleni mae athrawon gwrywaidd (a blewog!!) yr ysgol wedi  tyfu barf yn ystod Mis Tachwedd er mwyn codi arian i elusen y diweddar Ray Gravell - chwaraewr rygbi enwog sy’n parhau i’n hysbrydoli heddiw. Mae’r elusen yn cefnogi unigolion ac achosion gwahanol yng Ngorllewin Cymru. Braf yw gweld, felly, fod cymaint o ddynion y staff wedi tynnu sylw at y gwahanol achosion drwy godi arian ar ran yr ysgol. Mae Manon Gravell o flwyddyn 12 a Gwenan Gravell o flwyddyn 9, hefyd yn hybu elusen eu tad.

“Rwy’n teimlo’n falch iawn fod pawb wedi dangos cymaint o gefnogaeth i’r elusen. Hoffwn ddiolch i bawb a wnaeth gymryd rhan” meddai Manon Gravell.

 Nid gaeaf oer fydd yn wynebu’r canlynol felly - Mr Euryn Madoc Jones, Mr Gwyn Jones, Mr Gareth Jones, Mr Alun Thomas, Mr Aled Williams, Mr Alan Roberts, Mr Mark Morris, Mr Iwan Harris, Mr Wyn Mainwaring, Mr John Norgrove, Mr Tim Hayes, Mr Rhys Roberts, Mr Owen Rhys a Mr Llyr Lloyd .

Diolch i bawb am eu noddi.

  Drama ‘A Christmas Carol 2011’

Ar nos Fercher a nos Iau, Tachwedd y 24ain a’r 25ain perfformiwyd y ddrama ‘Christmas Carol 2011’ gan ddisgyblion Ysgol Bro Myrddin. Wrth gwrs, gŵyr llawer ohonom bod y nofel ‘A Christmas Carol’ gan Charles Dickens a’i neges lawen o gariad trwy achubiaeth y cybydd, Scrooge, wedi diddanu darllenwyr ar hyd y blynyddoedd. Roedd y cynhyrchiad hwn, er waethaf yr ychwanegiadau cyfoes a thôn y sgript, yn dal yn ffyddlon i gred Dickens bod cyfnod y Nadolig yn llawn rhinweddau i newid dyn.

Cafwyd perfformiadau arbennig gan y prif gymeriadau: Steffan Rizzi yn portreadu Scrooge, Steffan Cennydd a’i bortread o Bob Cratchit, Llew Hopwood fel Jacob Marley, Siobhan Eleri fel ysbryd Nadolig y gorffennol, Serena Jones fel ysbryd y Nadolig presennol , Nathaniel Wilson fel ysbryd y dyfodol, Aled Owen fel Fred a Cerys James fel Mrs Cratchit. Cynhaliwyd y rhain gan llu o ddisgyblion eraill, y cantorion a’r cymeriadau ymylol. Cyfarwyddwyd y sioe gan Mrs Llinos Mary Jones, pennaeth yr Adran Saesneg a’r is-gyfarwyddwr oedd Miss Kathy Thomas. Miss Rhian Evans oedd y cyfarwyddwr technegol a’r rheolwraig lwyfan oedd Miss Bethan Simons. Cafwyd cymorth gan lu o bobl cefn llwyfan a fu’n cynorthwyo gyda’r set, y gwisgoedd, y colur a’r propiau. Bu tim o bobl hefyd yn cynorthwyo gyda’r rhaglen a gwerthu’r tocynnau.

Cafwyd dwy noson lwyddiannus iawn. Diolch i bawb a fu’n cynorthwyo a chefnogi.

Gweler mwy o luniau a fideo ar ein safwe FLICKR a YOUTUBE

  Gweithdy Dangoswch y cerdyn coch i hiliaeth
Ar ddydd Llun, Tachwedd y 21ain cynhaliwyd gweithdai gan y cwmni o Gaerdydd - Dangoswch y Cerdyn Coch i Hiliaeth yn yr ysgol. Cafodd pob disgybl o flwyddyn 7 y cyfle i gymryd rhan a bu’n ddiwrnod arbennig o drafod a chydweithio. Cafwyd cyfle i drafod stereoteipio, dylanwad y cyfryngau a diddorol oedd y sesiwn i drafod termau derbyniol erbyn hyn. Cafwyd cyflwyniad bywiog iawn ac ymateb arbennig gan y disgyblion. Diwrnod buddiol iawn.

  Dathlu Ffair Nadolig Bro Myrddin

Dechreuodd dathliadau’r Nadolig i Ysgol Fro Myrddin a’i chymuned yn gynnar yn ein ffair flynyddol a gynhaliwyd ar nos Iau 17eg o Dachwedd. Agorodd y drysau yn brydlon am 6.30 a chafwyd cynulleidfa chwantus yn barod i brynu nwyddau o’r amrywiaeth stondinau lliwgar a deniadol oedd ar gael. Croesawyd y cyhoedd gyda naws Nadoligaidd gan aelodau o fand yr Ysgol yn perfformio carolau’r Nadolig.

Bu’r llysoedd yn cystadlu’n frwd i werthu nwyddau eu stondinau. Bu Llys Peniarth yn gwerthu siocledi o bob math ac roedd gan  Llys Hergest stondin yn gwerthu cynnyrch Nadoligaidd fel papur lapio cardiau ac addurniadau. Stondin llenwi hosan Nadolig oedd gan Llys Hengwrt gyda amrywiol gynnyrch a gwerthwyd llawer gan Llys Llwydiarth gyda’i stondin mygiau yn llawn danteithion.

Roedd Groto Sïon Corn dan eu sang gyda’r plant ieuengaf yn disgwyl yn eiddgar a chyffrous am anrheg a sgwrs. Trefnwyd gemau gan aelodau o’r chweched yn cynnwys cystadleuaeth “Malu’r Malteseren” a gemau “Rasio gyda Mario”. Gwelwyd disgyblion cwrs Y Fagloriaeth Gymraeg yn gwerthu cynnyrch eu busnesau – lluniau chwaraeon , breichledi, ffynnon siocled a chardiau Nadolig.

Bu’r noson yn llwyddiant ysgubol a llwyddwyd i godi £2,800 o bunnoedd. Nadolig Llawen iawn, felly, i Ysgol Bro Myrddin.