Llwyddiant Cenedlaethol

Llongyfarchiadau i'r canlynol ar gael eu derbyn i ensemblau cenedlaethol:

Llewelyn Edwards Blwyddyn 13 - Cerddorfa Ieuenctid Cymru a Band Chwyth Cymru, Cathryn Rees Blwyddyn 11 - Cerddorfa Ieuenctid Cymru, Elan Richards Blwyddyn 11 - Côr Ieuenctid Cymru a Tom Scaife Blwyddyn 13 - Cerddorfa Ieuentid Cymru.
Dymuniadau gorau i'r pedwar ohonynt.

  Gwasanaeth carolau arbennig
Llwyddwyd i greu gwir naws y Nadolig gan Ysgol Bro Myrddin ar nos Fawrth, Rhagfyr yr 20fed pan gynhaliwyd ein gwasanaeth carolau yn Eglwys San Pedr yn y dref. Braf oedd gweld dros 250 o ddisgyblion a 50 cant o staff yn rhan o’r gwasanaeth arbennig hwn. Roedd yr eglwys yn llawn a phawb yn barod i ddathlu’r Nadolig. Agorwyd y noson gan leisiau unigryw y côr merched hŷn yn canu ‘Y Forwyn Fair’ ac yn ddiweddarach canwyd ‘Carol Dwy fil’ ganddynt yn ogystal. Yn dilyn, cafwyd galwad i addoli gan Mr Dorian Williams, pennaeth yr ysgol. Yn ystod y noson cafwyd darlleniadau gan ddisgyblion o’r ysgol, y prif ferch, Llywela Davies a’r prif fachgen, Sean Bergiers a dau o ddisgyblion blwyddyn 11 sef Llifon Davies a Fiona Phillips. Cafwyd darlleniadau hefyd gan Mrs Mandy Walters, Cadeirydd y Gymdeithas Rieni a Mr Alun Charles, is-gadeirydd y Llywodraethwyr. Darllenwyd y carolau gan ddisgyblion o’r ysgol – Cai Evans, Garmon Dyfri Jones, Nia Davies a Mared Jones a chafwyd unawd gan Osian Knott. Cafwyd gwledd o ganu gyda’r côr iau a’i datganiad o ‘Daeth Iesu o’i gariad’ a ‘Y Nadolig’, y parti bechgyn hŷn yn canu ‘Dilyn y Seren’, y côr staff yn canu ‘Mab y Forwyn’ a’r côr hŷn yn gorffen y noson gyda’r gân ‘Un Enaid Bach.’ Bu’r cerddorion hefyd yn brysur yn cyfeilio i bob carol a chafwyd datganiad gan y grŵp chwythbren hefyd. Cafwyd cyflwyniad diddorol hefyd o’r enw ‘Gwyrth y Beudy’ gan ddisgyblion blwyddyn 7 a braf oedd gweld un o ddisgyblion yr ysgol, Catrin Price, yn dawnsio i sain y côr staff. I gloi’r noson adroddwyd y fendith gan y parchedig Leigh Richardson.

Hoffai’r ysgol estyn ein diolchiadau i swyddogion Eglwys San Pedr am gael defnyddio’r eglwys, i Mr Meirion Wynn Jones am ei barodrwydd i fod wrth yr organ ac i athrawon teithiol Gwasanaeth Cerdd Sir Gaerfyrddin am eu cefnogaeth. Hoffem ddiolch hefyd i’r holl ddisgyblion a staff a wnaeth gefnogi’r noson ac i’r rhieni am eu cefnogaeth barod. Roedd casgliad y noson yn mynd i’r Ambiwlans Awyr a chodwyd dros £700 o bunnoedd, diolch yn fawr i chi i gyd. Bu’n noson arbennig ac yn ddathliad go iawn o wir ystyr y Nadolig. Nadolig Llawen i chi i gyd.

  Bro Myrddin yn dathlu’r Nadolig
Bu pythefnos olaf y tymor yn gyfnod tu-hwnt o brysur yn Ysgol Bro Myrddin. Dechreuwyd y dathliadau gyda blwyddyn 6 yn ymweld â’r ysgol ar y 13eg o Ragfyr ac yna cinio Nadolig i bawb ar y diwrnod canlynol a braf oedd cael y cyfle i thynnu cracyr, gwisgo het a mwynhau. Chwaraewyd bingo yn y neuadd o dan arweiniad y chweched ar yr un diwrnod.

Ar gais y pwyllgor dyngarol, cafodd y disgyblion gyfle i wisgo eu dillad eu hunain ar ddydd Gwener yr 16eg o Ragfyr gyda elw’r dydd yn mynd i Dŷ Hafan a Phlant mewn Angen. Bu’r chweched yn gwerthu cacennau hefyd adeg egwyl er mwyn ychwanegu at y swm. Casglwyd swm anrhydeddus o £600 ar y diwrnod.

Ar y dydd Llun y 19eg o Ragfyr, teithiodd criw o ddisgyblion yr adran Addysg Gorfforol i siop Marks and Spencers er mwyn pacio bagiau am yr wythnos ac aeth criw o ddaearyddwyr blwyddyn 10 i wneud eu gwaith maes yng Nghaerdydd.

Ymarfer ar gyfer y gwasanaeth carolau oedd y prif ddigwyddiad ar y dydd Mawrth a thua 250 o ddisgyblion yr ysgol yn teithio i lawr i Eglwys San Pedr i ymarfer ar gyfer y gwasanaeth arbennig a gynhaliwyd yn y nos. 

Panto blwyddyn 12 oedd yr arlwy ar ddydd Mercher. Bu criw blwyddyn 12 wrthi’n brysur ers wythnosau yn paratoi ar gyfer y panto blynyddol a chafodd disgyblion blynyddoedd 7 ac 8 y cyfle i fod yn rhan o’r dathlu yn ystod y dydd. Roedd hi’n ddiwrnod gwahanol hefyd gan bod y disgyblion i gyd wedi cael y cyfle i wisgo mewn thema Nadoligaidd a chafwyd gwobrau am y wisg ffansi orau ymhob blwyddyn.

Braf oedd cael cyfle ar y bore dydd Iau i gynnal gweithdy gyda blwyddyn 7 yn y neuadd. Yn dilyn hyfforddiant, mae criw o ddisgyblion blwyddyn 12 bellach wedi llwyddo i ennill tystysgrif mewn mentora a chafwyd cyfle i gychwyn ar y sesiynau mentora yn y gweithdai. Teithiodd grŵp chwythbren yr ysgol i Barc y Sgarlets i gyflwyno rhaglen o gerddoriaeth fel cynrycholiaeth o Wasanaeth Cerdd Sir Gaerfyrddin. Bu grŵp pres yr ysgol a chriw o gantorion o’r chweched yn cyflwyno rhaglen yng Nghanolfan Henoed Myrddin yn y bore o dan arweiniad Mrs Helen Gibbon, Mrs Meinir Richards a Mrs Nia Evans.

I gloi’r tymor cafwyd gwasanaeth arbennig ar brynhawn dydd Iau a chyfle i glywed offerynwyr, cantorion a darllenwyr yr ysgol mewn gwledd o ganu ac actio.