A yw’n deg?:  Cynhaliwyd diwrnod “A yw’n deg?” yn yr ysgol yn ddiweddar gan yr Adran  Addysg Grefyddol o dan arweiniad Mrs Helen Gibbon.  Diwrnod arbennig  oedd hwn yn cynnwys gweithdai amrywiol gan y Parch Tom Defis, Gêm  Fasnach, Rhian Jones Swyddog Addysg Shelter Cymru a Rosalyn James  Swyddog Addysg Tai Hafan.  Bu Indeg Jameson, Gruffudd Perks, Annwen  Davies, Iestyn Scourfield, Elin Williams a Gweirydd Davies o  flwyddyn deuddeg yn gyfrifol am y gweithdy Hawliau dynol a Mrs Tracy  Jenkins a Mrs Bethan Jenkins yn canolbwyntio ar Ragfarn a Gwahaniaethu.   Yn ystod y dydd cafodd disgyblion o flwyddyn deg y cyfle i gyfrannu at  drafodaethau, chwarae rôl a chwarae gemau, a’r cyfan yn eu dysgu sut mae  pobl yn trin ei gilydd yn gymunedol, yn gymdeithasol ac ar lawr gwlad  mewn byd busnes a masnach.  Dysgwyd llawer am dlodi a digartrefedd,  hawliau dynol, rhagfarn a gwahaniaethu.  Yng ngeiriau rhai o’r  disgyblion, “Roedd yn ddiwrnod hwylus iawn.  Roedd y gweithgareddau yn  ein helpu i ddeall beth sy’n digwydd yn y byd heddiw, pethau nad ydym yn  sylweddoli.”

 

Pe bawn i’n gynghorydd am ddiwrnod..:  Yn Sioe Amaethyddol Frenhinol Cymru ac Eisteddfod  Genedlaethol 2007 cynhaliwyd cystadleuaeth gan Gymdeithas Llywodraeth  Leol Cymru er mwyn tynnu sylw at yr hyn mae’r cynghorau’n ei wneud ac i   geisio hyrwyddo democratiaeth leol.  Un disgybl a ddangosodd  flaengaredd yn y gystadleuaeth  ac a gafodd ei dewis yn un o ddau  enillydd oedd Awen Morgan o flwyddyn 8.  Dyma’r syniadau a oedd ganddi  ar gyfer gwella ei chymuned; “Pe bawn i’n gynghorydd am ddiwrnod, fe  fyddwn i’n mynnu i bawb blannu coeden a defnyddio biniau ailgylchu.   Byddwn i’n rhwystro’r siopau rhag defnyddio bagiau plastig hefyd.”  

Cyflwynwyd gwobr i Anwen gan Gadeirydd y Cyngor a  Rheolwr y Gwasanaethau Democrataidd. Llongyfarchiadau mawr iddi!