Diwedd y tymor hwn byddwn fel ysgol yn ffarwelio gydag aelod gwerthfawr o staff sydd wedi bod yma o’r dechrau cyntaf o 1978 hyd at y presennol sef ein dirprwy Mrs Meinir John. Dechreuodd ei thaith ym Mro Myrddin fel Pennaeth yr Adran Gwyddor Tŷ pan agorodd yr ysgol yn Medi 1978 a chyn hynny roedd wedi dysgu am 3 blynedd yn Ysgol Uwchradd Ystrad Tywi yn Nhreioan. Datblygodd ei chyfrifoldebau yn fuan ac yn Medi 1988 dechreuodd fel Pennaeth Ysgol Ganol yn gyfrifol am ofal bugeiliol a disgyblaeth blwyddyn 10 ac 11. Ar y pryd roedd hefyd yn bennaeth adran Gwyddor Tŷ. Yn ystod y cyfnod o 1978 tan 1988 bu hefyd yn Bennaeth ar lys Hergest. Yna, ym Medi 1998 dechreuodd ar ei swydd bresennol fel Dirprwy Bennaeth yr ysgol yn dilyn ymddeoliad Mr Wynne Jenkins. Mae’n dal yn llenwi’r swydd honno, ond ar ddiwedd y tymor hwn, mae’n gyfle i newid byd a dymunwn bob hapusrwydd yn ei hymddeoliad.

Cyfweliad â Mrs John gan Ennlli ac Gwenno

Beth yw eich atgof mwyaf cofiadwy ?

Y diwrnod cyntaf ym Medi 1978 a 213 o ddisgyblion wedi dewis addysg Gymraeg. Gwireddu breuddwyd wedi deng mlynedd o ymgyrchu gan bobl yr ardal - o’r diwedd yr oedd Ysgol Gymraeg yn agor yn y dre. Bu ymgyrchu brwd gan ddechrau gyda chriw bach o bobl yng nghanol 60au’r ganrif ddiwethaf - Ifan Dalis Davies, Islwyn Ffowc Elis, Tecwyn Lloyd ac T James Jones a’u gwragedd. Roeddwn i hefyd fel disgybl wedi ymgyrchu pan yn Ysgol Ramadeg y Merched i gael ysgol Gymraeg gan fod ein haddysg ni bron yn gyfan gwbl yn Saesneg heblaw am wersi Cymraeg ac Addysg Grefyddol. Er bod nifer o’n hathrawon yn medru’r Gymraeg prin iawn y clywem yr iaith yn yr ysgol. Ethos hollol Seisnig oedd yn yr ysgol honno.

Sut mae’r ysgol wedi newid ?

Wedi tyfu o’r 213 disgybl gwreiddiol ym 1978 i 900 heddiw a’r adeilad hardd sydd gyda ni nawr o’i gymharu â’r hen adeilad yn y dre.

Beth fyddwch yn gweld ei eisiau?

Cwmni’r disgyblion a’r staff

Beth na fyddwch yn gweld ei eisiau?

Y gwaith papur diddiwedd !!

A oeddech chi wastad am fod yn athrawes?

Oeddwn am wn i.

Pa bynciau i chi wedi dysgu ? - Coginio, Tecstilau, Cymraeg ac Addysg Grefyddol.

Pa athro / athrawes oedd wedi dylanwadu fwyaf arnoch chi?

Fel disgybl ysgol yr un a gafodd y fwyaf o ddylanwad arna i oedd Beti Hughes, Pennaeth yr Adan Gymraeg yn ysgol Ramadeg y Merched ac a ddaeth wedyn yn Ddirprwy Brifathrawes gyntaf Bro Myrddin. Cefais y fraint o fod yn ddisgybl iddi a chydweithio gyda hi yn ddiweddarach yn yr ysgol hon. Un oedd yn meithrin Cymreictod ynoch heb i chi sylweddoli ei bod yn gwneud hynny

Fel athrawes yr athro a gafodd y dylanwad mwyaf arnaf i oedd Mr Wynne Jenkins - y Dirprwy Bennaeth o’m blaen. Wrth ddilyn ei esiampl ef y sylweddolais bwysigrwydd disgyblaeth gadarn, gyson a theg er mwyn sicrhau bod disgyblion yn meithrin hunanddisgyblaeth. Braint i mi oedd cael olynu Wynne pan ddaeth yr amser iddo ymddeol yn 1998.

Pa lys yw’r gorau yn yr ysgol?

Mae pob llys yn gweithio’n galed ac yn cyfrannu at fywyd diwylliannol yr ysgol ond gan i mi fod yn Bennaeth ar Lys Hergest am 10 mlynedd rhaid dweud bod lle cynnes iawn yn fy nghalon i’r llys hwnnw. Mae’n ddiogel i mi ddweud hynny erbyn hyn!!

Sut rydych chi wedi elwa o fod yn yr un ysgol am 33 mlynedd ?

Mae sefydlogrwydd staff yn elfen bwysig iawn o lwyddiant unrhyw ysgol ac mae adnabod y disgyblion a’u teuluoedd yn gymorth mawr i gynnal safonau academaidd a disgyblaeth. Gan fy mod erbyn hyn wedi dysgu rhieni nifer fawr o ddisgyblion yr ysgol teimlaf fod y ddolen gyswllt yn bwysig. Fel ysgol rydym yn ffodus iawn o’n staff ymroddedig a sefydlog ac mae’r elfen deuluol yn parhau, a gofal yn bwysig iawn wrth ymdrin â disgyblion a staff. Mae’r Prifathro, Mr Dorian Williams, a'r Staff yn gweithio fel tîm er lles y disgyblion ac yn gofalu am ei gilydd hefyd.

Unrhyw gyngor i’r Dirprwy newydd ?

Mwynhau’r gwaith a sicrhau bod pobl yn dod o flaen papur. Dyna’r cyngor a gefais i gan Mr Eric Jones wrth iddo fy mhenodi yn Ddirprwy. Cyngor doeth gan Brifathro doeth a chadarn.

Beth ydych chi yn bwriadu gwneud ar ôl ymddeol ?

Mwynhau a manteisio ar y cyfle i wneud yr hyn nad oedd amser i’w wneud pan yn dysgu.

Golyga ymddeoliad Mrs Meinir John, ein Dirprwy, ddiwedd cyfnod yn hanes Bro Myrddin.

Fel athrawes, rheolwraig ac arweinydd bu iddi gario gwerthoedd yr ysgol hon gyda hi drwodd o 1978 hyd heddiw. Gŵyr miloedd o ddisgyblion a llu o staff ar hyd cyfnod o 33 blynedd ei bod hi wedi llwyr ymrwymo i ddisgwyliadau uchel gan anelu’n gyson at y safonau uchaf posibl o ran ymddygiad. Hefyd, cydnabyddaf ei hymrwymiad i bopeth gwerth chweil sy’n gysylltiedig ag addysg cyfrwng Cymraeg llwyddiannus. Gyda chof da am enwau, roedd Mrs John yn adnabod pawb ac, o ganlyniad, yn medru cofio cysylltiadau teuluol nôl dros dri degawd. Tipyn o gamp a chyfraniad hollbwysig i naws deuluol yr ysgol.