Profiadau gwerthfawr yng Nglanllyn

Tridiau o gwrs preswyl – dyna oedd yr arlwy i ddisgyblion  Blwyddyn 12 Adran y Gymraeg yng Ngwersyll yr Urdd Glan-llyn ganol y mis.  Tridiau o wrando ar enwogion fel Maureen Rhys a John Ogwen, Emyr  Llywelyn, Ceri Wyn Jones ac Eleri Mynytho yn traethu ar waith cwrs a  llyfrau gosod a llonyddwch hudolus Llyn Tegid yn gefndir i’r cyfan.  Cafwyd digon o sbort a sbri hefyd, yn enwedig yn y twmpath ac yn y  Talwrn, pan lwyddodd disgyblion Bro Myrddin am yr ail dro yn olynol i  gipio’r cwpan. Bu cyfle hefyd i grwydro ychydig o’r ardal a nodi llefydd  o bwys i’r traddodiad llenyddol. Clywyd hanes Bob Tai’r Felin a hanes  Gwrthryfel y Pasg yn Nulyn a’r gwersyll a godwyd i’r mil, tri chant o  garcharorion yn y Fron-goch. Rhyfeddwyd at brydferthwch Llyn Celyn a’r  capel coffa o gofio’r anghyfiawnder a fu yno. Wrth yr Hen Gapel yn  Llanuwchllyn,  cafwyd hanes y fintai gyntaf a aeth i’r Wladfa dan  arweiniad Michael D. Jones ac wrth grwydro’r pentref ei hun – o’r   gilfach goffa i’r ddwy fynwent a’r Neuadd Wen,  sylweddolwyd mawredd  cyfraniad Syr Owen a Syr Ifan ab Owen Edwards at barhad ein hiaith.

Dyma gerdd o waith Gweirydd Davies a gyfansoddwyd ar  gyfer cystadleuaeth y Talwrn. 

 
 Perthyn

 

 Pan  welaf Gymru’n colli o bump i nawdeg tri,

  Adegau  fel rhai felly sy’n torri ’nghalon i.

  Pan glywaf iaith estroniaid yn dod wrth Gymry glân

 Adegau  fel rhai felly sy’n diffodd fflam y tân.

 Pan  welaf fwg diwydiant yn creithio’r wybren las

 Adegau  fel rhai felly sy’n codi ynof gas.

  Ond  pan gura’r Cymry’r Saeson, dyna yw fy nef

  Ag  adlais pêr fy mamiaith i’w glywed mewn un llef.

 A phan  welaf afon Teifi’n llifo ar ei thro

 Ar  adegau  felly rwy’n teimlo gafael bro.

 

  Gweirydd Davies.

 Plant Mewn Angen

Gwelwyd tipyn o  gyffro yn neuadd yr ysgol ar fore Iau’r 15fed o Dachwedd  wrth i griw  helaeth o athrawon baratoi ar gyfer perfformio’r  alaw “Twinkle Twinkle  Little Star” ar eu ffidlau o flaen  yr  ysgol gyfan.  Yn ystod yr wythnosau diwethaf mae’r disgyblion sydd yn  derbyn gwersi llinynnol wedi bod yn hyfforddi’r athrawon a’u paratoi ar  gyfer y sialens hon er mwyn codi arian i Blant Mewn Angen.  Heb os, yr  oedd hi’n her i bawb, yn athrawon ac yn ddisgyblion.  Rhaid eu canmol  oll am eu hymdrechion diflino a’u dyfalbarhad am beidio â rhoi’r ffidil  yn y to!

 

 Roedd her arbennig  yn wynebu ein prifathro Mr Dorian Williams gan iddo gael ei ddewis i  berfformio’r alaw yn fyw ar y teledu. Profiad bythgofiadwy rwy’n siwr.   Codwyd cyfanswm o £1,600 o bunnoedd. Diolch i’r noddwyr ac i bawb a fu’n  rhan o’r sialens           

 Gwyddbwyll

Cynhaliwyd gêmau  cyntaf y tim gwyddbwyll yn erbyn Ysgol Esgob Vaughan, yn ddiweddar.  Yn  cynrychioli’r ysgol roedd Ifan Johnson, Evan Osborne, Rhys Nugent a Rhys  Evans.  Gwelwyd sawl gêm agos iawn ar y noson gyda’r capten Ifan Johnson  o fewn trwch blewyn o gipio’r wobr.  Wedi cystadlu brwd ar bob un o’r  byrddau colli  a wnaeth Bro Myrddin yn erbyn tim B Esgob Vaughan o  hanner pwynt i dri phwynt a hanner.  Serch hynny  cafwyd tipyn mwy o  lwyddiant yn erbyn tim C y gwrthwynebwyr wrth i Rhys Evans garlamu i  fuddugoliaeth yn erbyn ei wrthwynebwr.  

 Yn ogystal â  llwyddiant i’r tim cyntaf bu nifer o chwaraewyr eraill y clwb yn  cystadlu mewn gemau cyfeillgar.  Yno yn cynrychioli’r ysgol hefyd oedd  Morgan Jones, Jac Davies a Huw Collins.  Rhaid eu canmol am eu  brwdfrydedd a’u parodrwydd i gefnogi tim yr ysgol. 

 Gwasanaeth Diolchgarwch yr ysgol :  

Diolch.  Gair bach chwe llythyren sy’n cael ei  ddefnyddio o ddydd i ddydd – a neb wir yn gwybod ei ystyr.  Yng  ngwasanaeth diolchgarwch yr ysgol eleni, cawsom gyfle i ddarganfod gwir  ystyr y gair a’i darddiad.  Esboniwyd am y cysylltiad rhwng y gair  diolch â’r geiriau “dioloch” a “dol”, yr un gair â “trontol”, sef y gair  Cymraeg am ddolen.  Syml yw sylwi fod pob dolen yn plygu.  Dangosai hyn  wir ystyr diolch, sef fod plygu a rhoi mawl i un a wnaeth gymwynas, yn  weithred  o ddaioni i ni. 

Yn  ogystal â chyflwyniadau a darlleniadau amrywiol  cawsom ein diddanu gan  gôr Blwyddyn 7 â’u perfformiad o “Rhoddwn Fawl,” deuawd  “Dwy law yn  erfyn” gan Enlli  ac Elan  , a “Mistar Duw” gan gôr Blwyddyn 8 a 9.   Cawsom eitem gan y Côr Bechgyn Hŷn a ganodd “Ceidwad y gannwyll” a  pherfformiad o  “Rhythm y ddawns” gan y côr hŷn i gloi’r gwasanaeth.   Trosglwyddwyd neges ddwys ar newyn yn ein byd gan aelodau o’r chweched  dosbarth gyda’r gân “Pan ‘da ni’n cefni” yn gefndir i’r holl ddarluniau  trist. Ein siaradwr gwadd eleni oedd y Parch. William Richards.  Gwasanaeth  hyfryd eleni eto!

Yn y gegin gyda Gwennan

Rhaid  llongyfarch Gwennan Jones o flwyddyn 10 am gyrraedd rownd Cymru yng  nghystadleuaeth “Future Chef 2008.”  Wedi llwyddo i gipio’r wobr gyntaf   yn yr ysgol ar ôl coginio prif gwrs poeth i ddau berson, aeth ymlaen i  ennill y rownd leol a gynhaliwyd  yng Ngholeg Pibwrlwyd Caerfyrddin.   Pob hwyl iddi gyda’r paratoadau ar gyfer rownd Cymru yng Nghaerdydd ym  mis Chwefror. 

 Pentathalon

Llongyfarchiadau mawr i Ffion Rees a gafodd ei  dewis i gynrychioli Cymru yn y Pentathlon yn Glasgow ddechrau Rhagfyr.   Dymuniadau gorau iddi gyda’r paratoadau ar gyfer y gystadleuaeth heriol  hon.