Newyddion Ysgol Bro  Myrddin

Elusennau: Cafwyd wythnos  o weithgareddau i godi arian yr wythnos diwethaf gyda Donna Jones o Flwyddyn 12  yn trefnu. Dechreuwyd yr wythnos gyda gwasanaeth ysgol ar thema addas. Ar hyd yr  wythnos, cafwyd amrywiol weithgareddau fel dyfalu nifer y losin, bechgyn y  chweched yn gwirfoddoli i therapydd iechyd gwyro eu coesau, diwrnod gwisg eu  hunain ddydd Iau ar thema Santes Dwynwen â’r chweched mewn gwisg ffansi a’r gêm  Siôn a Siân Ddydd Gwener. Casglwyd cyfanswm o £1,400 ar gyfer Ymchwil y Galon a  £280 o bunnoedd at Ysbyty Glangwili.

Sioe Ffasiynau:  Bydd disgyblion chweched dosbarth Adrannau Busnes  a Hamdden yr ysgol yn trefnu Sioe fydd yn arddangos dillad Marks and Spencer yn  neuadd yr ysgol ar yr 22ain o Chwefror am 7 yr hwyr. Llwyddodd y disgyblion i  sicrhau arweinydd o fri ar gyfer y noson sef Huw (Ffash) Rees. Bydd tocynnau ar  gael o’r ysgol a bydd pris mynediad sef £7 i oedolion a £5 i blant ysgol yn  cynnwys lluniaeth. Rhennir elw’r noson rhwng dwy elusen sef Ymchwil Cancr y Fron  Breakthrough  a Ty Llywelyn, Glangwili.

 Cystadleuaeth y Cogydd Ifanc:  Cynrychiolwyd yr ysgol gan ddau dim yn y gystadleuaeth  hon a drefnwyd gan Glwb Rotari Tywi a Chaerfyrddin yng Ngholeg Pibwrlwyd. Cafodd  Angharad Morris a Naomi Elias  hwyl ar y coginio tra bu Catrin McCabe a  Ceirios Davies yn eu cynorthwyo. Y dasg oedd cynllunio, paratoi, coginio a  gweini pryd o fwyd tri chwrs i ddau berson am lai na £14 mewn dwy awr. Daeth  cogyddion o’r Llwyn Iorwg a’r Black Ox i feirniadu’r gystadleuaeth a daeth y  cogydd enwog Dudley i wylio am gyfnod. Er na wnaethon nhw ennill cafwyd cynnyrch  o safon ganddynt.

Rygbi:  Llongyfarchiadau i Jason Harries gafodd ei ddewis i chwarae dros Gymru dan 18 yn  Lille.